Sitangianghonon Ganup Ari

ARI SENEN: KELUARGA DOHOT ULAON

• Asa gabe parasiroha halak Kristen di sandok parngoluonna.
• Asa lam tu bisukna angka natoras manogunogu dohot mangajari angka anakhonna hombar tu lomo ni roha ni Debata.
• Asa dipasupasu jala ditumpahi Debata angka ulaon di huta, di balian, dohot di sude inganan pangulaon na marragam i.
• Asa dibasabasahon Debata ulaon, pandaraman dohot pandapotan na tama tu sandok ruas ni huria.

ARI SELASA: DONGAN, SISOLHOT, DOHOT LINGKUNGAN

• Asa lam tubu roha na masihaholongan dohot na masijangkonan jala masiurupan di angka ulaon di tonga ni huria dohot di saluhut rumang ni parsaoran.
• Asa lam denggan parsaoran ni ruas tu ruas di tonga ni huria, ruas tu parhalado, dohot parhalado tu parhalado; lam sada halak Kristen di sude inganan dohot di sandok portibi on (oikumene).
• Asa lam sada angka na marhahaanggi dohot na marsisolhot, na marhombar bagas dohot na marsahuta, ro di angka mardongan dohot na maraleale sinondangan jala siniraan ni holong ni roha na sian Tuhan i.
• Asa lam tubu panghilalaan dohot panandaon di pasupasu ni Debata di bagasan parasingasingan.
• Asa lam tubu panghilalaan na manarihon hatigoran, hadameon, dohot keutuhan ni sandok na tinompa.

ARI RABU: PANOGUNOGUON

• Asa dipasupasu Debata angka parpunguan kategorial di tonga ni huria.
• Asa ditumpahi angka badan/lembaga dohot parsingkolaan manang kursus dohot pelatihan na manghobashon panogunoguon, pangajarion, dohot pamodaion di sude rumang ni parbinotoan dohot pangalaho di angka sundut na umposo, angka na hinobashon ni hura, masyarakat, dohot bangso.
• Asa lam marbisuk jala margogo angka guru huhut rade mamelehon dirina di ulaon panogunoguon (pendidikan).
• Asa lam ringgas angka parsiajar jala ungkap tu parbinotoan dohot hapistaran na marhapantunon jala marhabadiaon.

ARI KAMIS: HAPAPATAR NI NGOLU HAKRISTENON

• Asa lam tangkas halak Kristen manghangoluhon haporseaon, haholongon, dohot panghirimon di sandok parngoluon dohot parsaoranna ariari; lam ringgas jala burju mangulahon ulaonna songon na tu Tuhan i, ndada tu jolma.
• Asa lam tangkas mananda jala manghamauliateon pasupasu ni Debata angka na jinalona, girgir rohana jala gok huhut tanganna manarihon na ringkot di harajaon ni Debata.
• Asa lam tubu roha na marpanarihon di ulaon diakoni di huria marsadasada dohot di hatopan ni HKBP.
• Asa lam margogo pasidinghon nasa pargasipan, isara hosom, teal, late, dohot elat ni roha.

ARI JUMAT: BANGSO DOHOT NEGARA

• Asa dibasabasahon Debata hasadaon dohot hadameon tu bangso dohot negaranta, dipatimbul pangabahan dohot hasonangan hombar tu tujuan ni kemerdekaanta.
• Asa ditambai holong ni roha di hatigoran di sandok rakyat ni bangsonta, disuanhon huhut roha na marhabiaran tu Ibana, na margigi mida dosa dohot na pasidinghon tondi pangahution.
• Asa dilehon Debata roha na marhabiaran tu Ibana tu angka na bisuk dohot partogi ni bangso dohot negaranta.
• Asa dipasupasu jala dipargogoi Debata pamaretanta laho mangulahon ulaonna, i ma na manuan uhum na denggan di tongatonga ni hajolmaon dohot na mamuji siula na denggan jala manguhumi siula hajahaton.

ARI SABTU: HAMAULIATEON DOHOT PARHOBASON TU PARMINGGUON

• Mandok mauliate siala saluhut pandonganion dohot pasupasu ni Debata ganup minggu na mardalan, lumobi hata na pinatubegehonNa ariari dohot hasesaan ni angka dosa na niasiasihonNa.
• Asa dipasupasu Debata sude parhobason ni parhalado partohonan dohot na so partohonan tu parpunguan dohot parmingguon marsogotna, lumobi parhobason ni angka na naeng manghatahon Barita na Uli i asa marsahala pangajarion dohot parjamitaonnasida jala margogo manghehei dohot mangonjar roha ni angka na umbegesa tu hamubaon dohot tu haimbaruon ni ngolu.
• Asa dihehei Debata roha ni sandok ruas ro tu parguruan dohot tu parmingguan, jala asa rade tu parsombaon, pamujion, pameleon, dohot panangihonon di hataNa di bagasan habadiaon na tama. 

ARI MINGGU: 

• Asa dipasupasu jala diramoti Debata mardalan pamingguon di bagasan hasonangan dohot habadiaon di sude inganan di sandok portibi on.
• Asa dipargogoi jala diparsahalai angka parhalado na manghobasi parmingguon dohot na patubegehon hataNa.
• Asa dipasupasu angka parminggu na mamuji goarNa jala na tumangihon HataNa asa lam tang dihaporseaon jala hehe tu parheheon partondion huhut hobas tu haimbaruon ro di saluhut na denggan.
• Asa lam rarat hata ni Debata marhite ulaon Zending tu bagasan dohot tu ruar ni huria na niulahon ni sandok na porsea.

Sumber: Almanak HKBP 2020